Pamulanna Lino Saelako Songka Eran di Langi'

Pamulanna Lino [klik untuk Terjemahan Bahasa Indonesia]

Ya ade’ tonna dolonan ma’sa’bumo taunna pura diboko’, malillinpa te lipu daenan, tae’pa temai olo’2, tae’pa temai kakayuanna, tae’pa temai tanan2an, tae’pa temai torro tolino.
Sikande pa ya langi’ na lino, sangtinti’ to ma’rampanan kapa’ anna tosibali Langi’ na Lino. Lan kasibalianna langi’ na lino dadi mi tu tau da’dua :

1. Puang Matua
2. Puang Tulak Padang

Puang Matua dadi kasibalianna langi’ na lino tang masai allo kaselle dadinna lobo’ garaganna sa kapua-puanna, Na temme’mi Puang Tulak Padang tu diona lino rokko na gundangngi Puang Matua tu langi’ langngan sisarak mi langi’ na lino, dadi kapadanganna, tarru’ Puang Tulak Padang rokko mangapi’na tana, tarru’ tu Puang Matua langngan langi’ umpapa’-paparanni langi’ kalua’. Yatonna domo langi’ tu Puang Matua mentiro tiku mi tae' bangpa ya apa latuo ma’tangnga’mi Puang Matua nakua yake susi to ladi kombong angge maritik ladi tampa sakka saeanna dikombong mi:

1. Puang Pirik-Pirik nenekna Angin
2. Datu Laukku’ nene’na Torro Tolino
3. Kumirrik nene’na Tallang
4. Banturino nene’na Tedong
5. Ta'bano Re’bona Lentek nene’na Bai
6. Pongmaro nene’na Manuk
7. Mambua Tasak nenena Kalosi
8. Mengkala’ka’ nene’na Riu sia
9. mintu nene’na te do kapadanganna

Nagaraga nasang Pong Matua to, ditampa lammai Sauan Sibarrung dikombong lammai Po’poran Siayoka Tonna sundunmo tu apa nagara pong matua do langi’, dao nasangpa ya langi tu apa mangka na garaga
Den misa tau do langi’ disanga pong Bura Langi’, bungka ba’bana langi’ dasa’ to paonganan na tiroi te lino, nakua la mellong di petondokki te lino diong apa na tutu’pa wai, tasik pidun-pidunanna pa te lino tonna ditiro domai tae'pa ya kapadangannan ma’tangnga’ mi Puang Matua, unnala mi litak sang lemon tu Puang Matua do tangngana langi’ na sembang biang buntu, na pentossokanni lako na buangmi Puang Matua domai langi te litak sang lemon situru’ biang buntu tualle tanete.
Tae na masai tuo tu biang lobo’ langngan langi’ ungkallo mi tangngana langi' ussangimi lindona bulan tu diona biang buntu tualle samara, mengkalomi ade’ tu Puang Bura Langi’ nasanga la menteka' dao mai la rampan dilino demme’ kapadanganna apa tae’pa na ma’tangnga lalan tu Pong Bura Langi domai langi’ unnola biang buntu, na iri’mi Datunna Angin, na iri’ rekke ulunna salu, engko bulaanna padang, kalambunan allo kadellekan kulla’.
Magiang mi sule, mi tu Pong Bura Langi langngan langi’, mekuta pole’omi lako puang matua nakua bo’yo’ mo’ aku tang bo’yo’ku malupu’ mo tang malupu’ku, apa napaluko lu dioya mai nene’na angin tu biang buntu tualle samara.
Ma’ tangnga’ omi Puang Matua, nakua mi Puang Matua ta garage eran dilangi’, ko digaraga mi tu eran dilangi’ garanto’na eran dilangi’ yamotu buntu la kawan tonna lino dolo, ya tonna mangka motu eran dilangi’ mengkalo nasang mi tu apa apa mangka nagara Puang Matua dao mai langi', apa den tallu olo’2 tae’ na ola eran dilangi’ belanna mataku’/magiang, yamotu

1. Nene’na tedong manturino, mengkalo daa ulunna tana
2. Nene’na bai disanga ta’bano re'bona lentek mengkalao dio kalambunanna langi’ jong belau
3. Nene’na manuk mempa’pak ya domai langi/ mentia’domai langi na ta’pa do raki’na to ma’lembang ba’tu do misa lopi na mane mettia’ tama pangala'

Yatonna benna mo eran dilangi’ mellong liu kasiumpuranna kasidenderanna tolino na Puang Matua, yanna den sara’ la na posara’ tu torro tolino latuka’na la solo’na kendek mekuta langangan Puang Matua unnola eran dilangi nenne’ duka tu Puang Matua mengkalo domai langi' ungkamaisei/umpakaboro’i tu apa mangka na padadi tu mentama nasang mo lino, lan duka tu yanna to ya duka tu Puang Matua na papa’paparanni mi/naborong-boronganni mi tu dionan katonganan, kuasa.
Den a’pa te tau na ben kuasa pong matua yamotu:

1. Puang Tulak Padang la poissanni tu diongna lu to kengkok/diongna lu padang

2. Puang Banggai Rante la poissanni te daona kapadanganna

3. Puang Gaun Tikembong poissanni te dona lu langi'

4. Malaika' Saratu' sumbung pio malaika' na pakaboro' Puang Matua ya mo la ussisolan Puang Matua dao pata’ kandaurena lan masuanggana

Passabaran songka eran di langi' sola tallanna Padang diRura

Penggauranna mo Saratu Sumbung Pio na urunganni songka tu eran dilangi’ Saratu Sumbung Pio umpogau 3 dosa/kasalan, yate Saratu Sumbung Pio senga’ bang ya pa’inaanna, senga’ bang ya pa’tangngaranna, na benmo katonganan Puang Matua na lamoraipa ya losong na Pong Matua lamoraipa ya pada Pong Matua, lamoraipaya sau’ Pong Matua

Tallu kasalan to na pogau Saratu' Sumbung Pio yamotu :

1. Boko te’tekanna puang matua dao langi’ yamito na diulai’ lammai langi, male daka’ sola kapalana setang kapalana kakadakean

2. Disio' tu aluk dao langi’ la diben torro tolino kua yamo lana poaluk torro tolino te disanga aluk sanda pitunna: pitung riu, pitung lampa, pitung sa’bu, pitung ratu’, pitung pulo, pitung lise’ pitung piak (7777777), apa yate aluk sanda pitunna disio’ domai langi’ tae'na ranpo nasang tama lino tallu ri angka pitu tu rampo tama lino, 7.777.000 [pitung riu', pitung lampa, pitung sa'bu, pitung ratu ] na kadang sa’pe ya Saratu’ Sumbung Pio sule tama langi’

3. ma’pentallunan yamo menggaranto’na tongan te sitetena tallan padang dirura den tananan dapo’ lau’ Rura disanga Londong Rirura, bainena disanga Sa’pang Digaleto pena’pa kianak te Sa’pang Digaleto na rindu bang tu anakna simisa’ bang muane na baine, yamo tu anakna Londong di Rura tu disanga to tirindu karua.
   Londong di Rura misa’ to su’gik apa ka'sek, noka ke male lakoi to senga’ tu pa’barangan apanna, yami tona bu’tu lan pa’tangngaranna Londong di Rura kumua mbai ma’din ya di pasibali te to siulu’ (umpa sisusuk bulunna ampa, umpasitengkan randanna dali’), malemi Londong di Rura lako misa’ tominaa lau rura disanga Mangngi’, mekutani Londong di Rura nakua bisa siaraka dipasibali tu tosiulu’,
   nakua mi tu tominaa Mangngi’ ee tae' ku bisa ala kara’tasan, lamalena aku mekutana langngan Puang Matua.
   Male tu tominaa Mangngi' langngan langi la mekutana langngan puang matua unnola eran dilangi’ mane sisaman tomonaa mangngi tu eran dilangi’, na tammui omi saratu’ sumbung pio, nakua umbalamu ola mangngi’, nakua mi tominaa Mangngi’ lamalena’ mekutana langngan Puang Matua ba’tula bisai tu tusiulu’ dipasibali, nakua mi Saratu Sumbung Pio da’omo mutarru sitiro Puang Matua, bisa bangsia tu to siulu di pasibali na denpa buanna rampanan kapa’ na denpa anakna na dila’lang kalua’i/na di paden aluk pengkaorongan ba’tu ma’rambu langi’

Sule mi tu tominaa Mangngi’, boko kada napakena mo iya Saratu’ Sumbung Pio, saemi lako Londong di Rura nakua ma’din sia ade’ apa yanna kianak mo dako ladi pademmo tu aluk pengkaorongan.

Kona garaga motu lantang, ya tonna lambi’mi allona dipogau’ diona rampanan kapa’ mintu’ kamaruasan napopake nasang, mintu’ oni na po oni, mintu’ gamara na po gamara. Narangi mi Puang Matua langngan langi’, mekutania Puang Matua domai, nakua ee Pong Bonggai Rante na’pai raka tu tau iti’ lino?. Londong di Rura umpogau rampanan kapa' anakna na pasibali. Sengke mi tu Puang Matua, ma’kada mi tu Puang Matua “tampak ropu sapuan pala’, tang ma’din iya tu tosiulu’ dipasibali, na sayu ba’tang iya ada’ sola pemali tu pasibali to massiulu’, tae’mo na ma’ tangnga’ kalando Puang Matua natumpumi tu eran dilangi anna songka, songka rekke ulunna salu, buttinna buntu lakawan, sarira tarru’ rekke sesean, yanasang mo bekasna eran dilangi tu songka.
Situang duka to allo yato tonna songka motu eran dilangi’, ma’kadami tu Puang Matua daomai langi’ rokko siulu’na Puang Tulak Padang : lendokan pi tu patongkonna tu lino iti’ tu sipatunna nani pa’maruasan/toma’rampanan kapa’. Nalendokan mi diong anna tallan tu padang dirura rokko posi’ tana lambe, mintu to mendioren to attu mangsan nasang/sabu’ nasang.

Ya tonna mangka to ma’kada mi tutorro tolino nakua umbamo latakua te?, la mekutana ki’ langan Puang Matua na songka motu eran dilangi’, nakuami Pong Matua domai langi', lando lalanniko pare-pare nangka passasaran tuyu/tominaa rekke ulunna salu, dilando lalanni mi Pong Sulo Ara’ rekke Sesean, Pong Bua Uran damai Tikala, Mandai Kema, Lo’ko’ Isi damai Sa’dan. Disanga male patutungan bia’, umpakalolo aluk tu pura na lutu tombang Londong di Rura.
Yatonna rampomo te a’pa tominaa damai ulunna salu dipogau’mi tu aluk pengkaorongan/mengkasala langngan Puang Matua, marassan dipogau, ma’kada mi Puang Matua daomai langi’ lako Tominaa Sulo Ara’sola Pong Bua Uran, yato kalosi lan sepu’mu buda rupanna
Yato kalosi kalebu tinti’na/susinna to masiulu bangpa, kalosi dipa’dua to sampu pissan, kalosi di tepo to sisampu penduan, ditepo karua tosisampu pena’pa, sia sitarru’na, tananni kade’, natananni tominaa tu kalosi, yatu kalebunna sola ditepona bangri taena tua/bosi, kalosi ditepo a’pa tuo apa kada tuona, kalosi dileso karua melu tuona, sia sitarru’na.

Rampo inde mo to tu kada disedan sarong di toke' tambane baka puama silambi' diomai nene' todolo
Ada' rampanan kapa' aluk 7777, kumua yanna den rampanan kapa' tae'na ma'din tu tosiulu dipasibali, tae'na melo tu tosampu pissan sibali, bisa sibali tu to sisampu penduan ke kapussakan mi, la melo tuo na ke sampu pentallun sia sitarru'na