Ma’parapa’ juga sering dilaksanakan pada acara ma’palao, yaitu membawa jenazah keliling ke suatu tempat lalu dinaikkan ke atas lakkian (tempat persemayaman sementara selama proses upacara berlangsung). Setelah itu, pemeran ma’parapa’ menenangkan suasana tempat dan dilanjutkan dengan membacakan riwayat hidup jenazah seperti berikut ini:
“Ia tonna tambuk buapi indo’ to mendadianna tonna sembe’ kalapa matasakpi dodo’ to kumombongna. Tang di kandean issun tang di laeran bua kayu, bulaan ia nakande indo’na bumbungan nairusan pare pulu’, napoganna’ tampa rapa’na naposundun pantarisanna. Nadigente’ todi kombong pare pulu’ to di pare'de bumbungan. Iamo na pa’pudingngi indo’na nasaberan kundai tama’, anna kasalle landi tambuk anna lobo’ landi bannean. Tonna lambi’mi bulanna tonnadete’mi pa’taunanna, dipangureasanmi ilan tangngana bongi di passuma’dinganmi ilan paseko malillin. Dilando lalannimi toma’pakianak, dilingka pa’taunnannimi tomangngapina tosikambi’ lolotau lan tangngana tondok. Limbongmi dao tangngana sondong, tasik umbone-bone dao limbu balana tananan sampa’. Ussuru’ ara’ tangboringanna dandanan sangka’ diong ballaran ampa’, ussapu boko’ tang beluakanna pananda bisara diong rantean tuyu. Masakke madarinding mi indo’ tomanggaraganna naria passakkena PUANG nasaladan ra’pak-ra’pak-Na TOTUMAMPATA. Didadian mi ilantangngana bongi ditibussananmi ilan pasekona malillin, mela’nak mi rokko solong diong papan lumi-lumi. Mekutana londongmi sang banuanna, meosik pekotintian kala’mi sangtondokna. Kumua tumba ria bulan tiapa ria pa’taunan, anna mema’tu-ma’tura langi’ anna kumanassak ra batara?
Anak ma’dika dikombong tau la’bi’ didadian, Pada didadian bulan pada ombo’ pariama. Todi dadian dao pusakna ombo’ dao tallobonna, asi-asi tumoninna bintoen rambu- rambunna. Mekutana dukami toma’pakianakna lako nenek naponenek diong tando’ bulayanna, meosik pekotintian kala’mi to ma’padadinna lako todolo napotodolo dao palangka rara’na, kumua didadianmo inde’ balo’ siosso’ demmoraka pasanga indo’ lana posanga pa’gantian ambe’ lana popa’gantianan. Apa mebali ia nene’naponene’ diong tando’ bulayanna sumu ma’tundu maleso ia todolo napotodolo dao palangka rara’na, kumua ladi sanga bangpa ia batto’/tato' (muane)/lai’(baine). Belanna to naria tannunki’ ia dandanan sangka’ tonasambe’ talikuran ki’ pananda bisara. Naganna’pa ia allo dadinna nasundun paia kulla’ katibussananna nadikai’ dao tangngana sondong nadi palesso’ samayanna dao limbu balana tananan sampa’. Namane disangai passanga indo’ nadiganti pa’gantian ambe’. Nalambi’ mi pole allo dadinna nadete’mi kulla’ katibussananna, dilando lalannimi rara makamban di lingka pa’taunannimi buku tangsi peaderan. Limbong dao tangngana sondong tasik umbone-bone dao limbu balana tananan sampa’. Di embong bulayanmi sang buku kada doing ballaran ampa’ diseno bane’ tangkarauan misa bunganna diong ma’rantean tuyu, situru’ sanga lana posanga sipanglola baan pa’gantianan lana popa’ gantianan. Disangami……………..... Manglellenanmi pole’ indo’ to mendadianna ma’tendeng mi ambe’ to kumombongnana, kumua te…..inde….inde….. mamma’ko kelamamma’ko ammu mamma’ na bumbun lobo’ matindo nataranak passakkeNa PUANG. Anna kasalle dadimmu nalobo’ garagnanmu, kasalle lomelendong sang tontian pelendongmu (muane)/ lomeurang sangburia’ peurang mu sang bakku’ pekabumbu’mu(baine), naperapi sang banuammu, naperapi sang tondokmu, naperapi bali lembangmu. Naporongko’i rapu tallang mu ondong na porongko’ indo’ ambe’mu. Kasallemi dadinna lobo’ kombong garaganna naria passakkeNa PUANG. Tinannak napolobo’ bumbungan napokasalle umpilei langsa’mi alukna PUANG bassi-basssian untonno’ bua kayu tasakmi sangka’na PUANG ambo-amboan, kesumbungmi passanga indo’ kesondongmi pa’gantian ambe’ disangami ……. tungka sanganna. Lumingka ma’ dena’-dena’mi tama tangngana pasa’ lumio’ ma’bekak-bekak tama lisu lembangna tammuan, sitiro lindomi sangbara’na ilantangngana pasa’ sitampa’ tau matami sangpaningona lanlisu lembangna tammuan. Ma’puduk kerandanmi lako tondon tobatangna ma’lila tokebiringmi lako batang dikalena, nakua melo bendanna telonga melo tibantukna pamiringna. Ditiro mandappi’ dimanta-manta mambela dimaya-maya, kema’dinni laku paorongngi ko rampanan kapa’. Diindo’mi kapuran pangngan situru’ ada’na lepongan bulan sipanglola baan sangkana parando dikapu’. Kada situru’mi pole’diong ballaran ampa’na rampanan kapa’ bisara misa bunganna diong rantean tuyunna pa’sullean allo, digente’mi totangsitimba malassu rokko ballaran ampa’na rampanan kapa’ totangsisiok makula’ rokko ballaran ampa’na pa’sullean allo. Diba’gimi tosanda rangka’na ditage’-tageranni topantan tarunona, di sangaomi………… Belanna inde’ anak nadadian bongsu nakondo tarapang umpolambanan duka alukna rampanan umpotete unnorong sangka’na pa’sullean allo, diba’gi dukaomi tosanda rangakana di tage’tageranni to pantan tarunona. Penduan kesondami passanga indo’ pentalluan kesolonmi pa’gantian ambe’, disanga omi ………….……… Ma’ sompo ma’ kepakmi ma’takia’ patomali, ma’ ampo lako-lakoan ma’taruk sia langngan –langngana, na ma’limbu-limbu ma’rapu ma’ kurungan ianasang. Langngan mi mendaun sugi’ kendek menta’bi ewanan. Matua indukmi dao tekuli’na padang banu’ karurunganmi dao telili’na lupu daenan. Hoe…….. sokan deata dilangi’ tedao topaonganann unnamboran tinaranna ussea’ kumba’ diroto-rotona, naamboran rekke toding nasea’ rekke talebon. Anna ambe’ki/indo’ki nabasa natitu’tunni sunga’ na randukmi nalambi’ makuyu langkan tipamula mi nabiring rammun manuk-manuk.
Mangngimpuru pampangmi saki unnanga’ ilan batang dikalena menta’du balian rammun ma’posanga-sanga ilan tondon tobatangna. Unnelong lendongmi dao tangngana sondong tonna kandaapa tondon penaanna, kume’lo masapimi dao tiku tambenna manangnga banua. Sumarro- marroi ampa’ mekkaindo’ri allonan.
Tangmengkata’ka’ tangmengkabo’yomi anak nadian bongsu nakondo tarapang, ullando lalanni pedampi totiang lako randanna langi’, ullingka pa’taunanni petamba’ tolakayang lako lelean uran. Sulemi ma’ponno sepu’na tibalik ma’lempan kalilingna, di tua’ barra’ bulayan tasak tama batang dikalena, di tongka kinande nane’ tangkauan tama tondonto batangna. Apa tangna patu tana’ mo ia pedampi totiang tangna panta’ tada-tadamo petamba’ tolakayang. Inde’ indo’ Belo Tumbang, tosi kammbi’ pedampi totiang daya ulunna langi’ tositaranakpetamba’ to lakayang daya karopokna batara tua, ma’kadamo kumua tangtibori’mo mata kalambanan puttamo lemba malaya’, pasitaranakmi alukna PUANGbassi-bassian pasisaladanmi sangka’na PUANG ambo-amboan. Kumombong tengko situru’mi anak nadadian tumampa batakan siolanan bongsu nakondotarapang, Kumua; tatumpumo mata eranna sulle togandang, naumpatumbang rebongan didi diong ballaran ampa’, takala’pa’mo tampak pelalanna solon to bombongan naumpamalinga’ aparan kayu-kayu diong rantean tuyu, situru’ aluk pengkalossoran sipanglola sangka’ pengkanorongan umpaorong kapassambayangan. Apa nokamo ia urrangi saru’ lolong di laningi’ mengkailingmo ia untanding talinga sarakka’ losson di batara. Belanna iamo napa’budai tula kumpang rokko rampe matampu’, ia napa’ kailui tula kumbaya’ rokko kabotoan kulla’. Natambaimi PUANGna naongli’ TO TUMAMPAna, ka’tumi angin bulayanna sisarak darinding kandaurena. Maseropindan batang dikalena mabase banaa tondon tobatangan. Sanda tumangi’ banua nenekna si’dan nasang tongkonan todolona. Apa sikasiri’ datupa ia matanna allo ilan tangngana tondok sikatangka ampulembangpa ia batunna kulla’ ilan ma’lipu mangka ditarik. Kumombong tengko situru’mi rara makamban tumampa batakan siolanan buku tangsipeaderan, kumua tapaturu-turu tomamma’pi dao tangngana sondong tapa ro’re toleagapi dao limbu balana tananan sampa’, namamma’ mennulu lulangngan ro’re menta’du lulako, natingara sengo’ papa naea’ ro’tona rinding nataranakki balla malassu, disangaomi tomakula’. Apa tonna tangsikasiri’ datumoia matanna allo ilan tangngana tondok tang sikatangka ampulembangmoia batunna kulla’ ilan ma’lipu mangka ditarik. Situndan tomamma’mi rara makamban lako randanna langi’ siruyang tomatindo mi buku tangsipeaderan. Kumua umbai denmo sesa tabubu’ ra’dak tapatama kurin, tapokinalloi lalan tama banua nenekta ta pobokong dilambanan tama tongkonan todolota. Tapabayui bayu sielle’na sile’tobarra’ta, tapatakinni(muane)/tapadodoi(baine) sangkalamma’na polo kaindi’ta. Tapabayui bayu sielle’na ambe’(muane)/ indo’(baine) tomendadianta. Digaronto’ mikalandona sangka’ ilan tangngana tondok diempunmi layuk lamba’na pananda bisara ilan ma’lipu mangka ditarik. Dipalilingmi lantang tau la’bi’, di pabendan lakian disura’ dipatulangda’ palangka rara’na, dipabendan barung-barung datu dipatunannang kakendenan malalundun lantang karampoan bo’yo’ tungka sanganna. Dipilean bukunna padang tarongko malia’, lana posimbuang batu ilan rante kalua’ ilan tandung kalonaran, lana pobalo’ siosso’ taruk bulayanna, lana tiro tuara’, lana potuleran kada kedenni sanglindo susinna lasipalimpa daona. Kumua den allona ina’ den kulla’pura diboko’, takumombong tengkosituru’ ilan te rante kalua’ tatumampa batakan siolanana ilantetandung kalonaran.
Belanna situru’ ada’ ilan lili’na lapongan bulan sipanglola sangka’ ilangontingna pandan matarik allo, ladisonda gayangngimo sang rara’na ladi solon tarapangngimi pa’gantian bulayanna. Belanna ia tu sanga naposanga pa’gantian napopa’gantian, napomasakke to allonaina’ naporongko’ tokulla’ pura diboko’, lana patorro dao tangngana sondong lana paunnisung maya-mayadao limbu balana tananan sampa’. Belanna sanga rongko’, pa’gantian maupa’, sanga napassakke PUANG MATUA. Kumombong tenkosituru’mi rara makamban diong ballaran ampa’ tumampa batakan siolanan buku tangsipeaderan diong ma’rantean tuyu, ambe’ pa’palumbangan ilan telepongan tondok ambe’ pa’paluku-lukuan ilan te ma’lipu mangka ditarik, unnangkaran kadamisa’ bisara misabunganna kumua ladi ganti mo ………….
Malemo naturu’ gaun naempa-empa salebu’. Sia male-manalena sau’ siamentangngana, ullambi’mi pasa’ langkan tammuanna manuk-manuuk, nanai torro malayo unnisung ma’lea-lea. Sia male-malena sau’ sauntangan lalanna. Lau’mi rantena tungga’ tenda’ liana Endrekang, umpo tedong tedong batu, umpo karambau tempe’, umpo barra’-barra’ bingin, umpokinande karangan. Malemi langngan langi’ tedao tondok batara, male sisola PUANGna sitaranak TO KUMOMBONGna”.
Kutipan di atas menceritakan perjalanana hidup almarhum, mulai dari dikandung sampai meningal dan bahkan diceritakan sampai menuju ke Soraga, seperti yang dinyatakan oleh “to ma’parapa’”.
Setelah pembacaan riwayat hidup selesai maka langsung disambung dengan penyampaian peraturan-praturan yang berlaku dalam upacara tersebut yang juga di sampaikan dalam bahasa “to minaa” seperti dalam kutipan berikut;
“Denkomani totama tuka’ totama solo’ rampo ma’dua takin untambuk essun masselle’ patomali, untambuk sukka masai selle’ tappa’ dipelayukki. Mu palutu tombang rokko te bendanna dandanan sangka’ mo paembong balatanan rokkote bendanna panda dibolong, ladao malangka’na buntu bombo mendeatanna nene’mu ponenene’ la umpopangngimba sabu’ bolongna natang manda’ mupobala kollong. Lamentiro lumbang PUANG MATUA dao mai tangngana langi’, mu male rekke ulunna salu napamarangkei ulunna salu, mumale sau’ tiparitikna minagalambe’ lana paba’ta’, mu male lako kabarrrean allo lana lambi’ ko lillinan parrak, mu male rokko kabotoan kulla’lana dete’ko pi’tuk tang gana-gana. Mu torro dao tangngana tondok lapu’pu’ bangkaan ko tang mennampo, tang memmimi’ ro’to’ anakpapa tangsikita pandakaran.
Apa ke ma’bulo lollong ko lendu’ tama te ada’na rante kalua’ kema’ ao’ tangkelesoan ko tiladung tama te sangka’na tandung kalonaran, PUANG MATUA dao tangnga lagi’ la umbura’ko uai sang pindan la umpi’pikki ko sakke sang gori-gori, ammu masakke mairi’ untorroi kuli’na padang.
Ke denko toparuru mintu’ apa mu ala randuk diomai paniti Sae lako Kapuanna lamu pasule. Damu den umpokinallo parurummu lako ongan banuammu belanna lana tumang tu manda’na. Ondong raka kedenni apanna tau mu ala kalengan, lana rimbakki ko pote bolongna bombo mendeatanna inde to di tongkonni allo leko’na na tang manda’ mu pobala kollong.
Kebendanni aluk masero pindan ketunannangngi sangka’ mabase banaa, la rapa’ tallang bulayanki’ diong sulengka rara’ta anta timmin bulo mapapa’ diong isungan makaraeng ta. Ta patanan rampa’ talinga duanta ta palidan maya-maya suling pa’peranginta”.
Kutipan tesebut berarti bahwa apabila ada orang yang mengacaukan upacara yang sedang berlangsung maka tidak akan panjang umur, tidak akan mendapatkan pekerjaan serta tidak akan mendapatkan keturunan. Tetapi apabila setiap orang dengan tujuan baik yang hadir dalam upacara tersebut maka TUHAN yang maha kuasa akan memberkati mereka. Dan bilamana kita menemukan sesuatu mulai dari yang paling kecil sampai yang paling besar harus dikembalikan, apalagi jika kita mengambil sendiri barang yang bukan milik kita/mencuri maka kita tidak akan panjang umur. Dan apa bila orang sedang beribadah kita herus tenang dan memasang telinga kita untuk mendengarkan firman TUHAN.
No comments:
Post a Comment