Masomba Tedong_4

• Nagaraganni tengko situru’ to sirio sukaran aluk lan padang di sillanan na kombongami sitindo’ to ma’mawa' to sisaladan bulo ala’ pananda bisara lan tongkonan Pemanukan, ta langnganpa ussurai kanan kairinna sumalunna Lombok tarekkepa ussara’ka jiong tiampan tikalebona, ta sorong rokko Puang Parande Padudung tedong ma’bulu datu ta pirikanni rokko suling kalaga bati’na pundu to sekko
  Na pokendekki lompona padang napolangnganni lu’pa tikalebona

• Lendu’ tama talinga duanmi tiranduk tama suling patomalinmi Puang Parande Padudung jiong mangapi’na tana, Puang la dilauranni rokko Puang la dipaparanni Puang sangpapa’na jiong Puang duang papa’na jiong tallu a’pa’ lima anna mangka sitodoran, na karuapa tang kulambi' annanpa tang kuratui
  Jiong Puang Matua, jiong Puang Makole-kole, Jiong Puang Tumampa tau kombong torro to lino danka apa tang na tampa aparaka tang nagaraga, umpasande rangka' umpapantan taruno ungkombong sanda mairi'
  Garagako sang ke'deran kombongko sangtiangkaran, Puang umpati' pemali jiong Puang to pasali ala',garagako sangke'deran kombongko sangtiangkaran massalendang sae lako massalendang sae rekke
  gaega'ko sangke'deran kombongko sangtiangkaran sola pambawa unta'mu passariri kinallomutu suas-suananmu, ammu ola la'pana litak, mu paella bura-bura
  Sikko liku mandalan mupotete mu polambanan, ammu kendek menggantananna tejio kapadanganna, pa'butagarimoko pa'bumarasa
  Dipasitammu sangsiporaianmu lan merrantena lino, dipasidete' sangbaisenmu lan pa'karerangan
  ku tambaipa sang puangmu kuolipa sang deatanmu

• Sitammu moko sangsiporaianmu lan padang di Deri sidete' moko sangbaisenmu lan Tongkonan Pemanukan
  pa'butagari moko lan rante masangka', pa'bumarasa lan tandung sea-sea, siayoka tedong ma'bulu datu si tindo' to ma'mawa' palisu sirenden
  Mu tambaipa sang Puang Mu, Mu olipa sang deatanmu

• Ambe' di Deri Ambe' di Sanggona, namatua induk sangkalelean banu' karurungan sanda mairi'
  Puang di to' Pamaling nanai rampan di lino sukaran aluk sundemme' kapadanganna aluk sanda pitunna, dinai tumanan bua' unnosok kaperaukan

Next| 1 | 2 | 3 | 4 |