Massomba tedong_3

• Maleako malinga'ko lele mekutana ko, kumua tambada ulang rara’na teapada banning bulawanna ketibungka’i pangkapu’ Puang ketikillangngi salimban to merammi
  Ulla’ka’na’ tedong ma’bulu datu mapasiayoka tedong bati’na pundu to seko, tumanan moko talinga duanmu palempemoko suling patomalimmu
  Napa sisalu-salunna tedong ma’ bulu datu napasi kadawang-sikadawangna bati’na pundu to seko ketirambanni jiong sumalunna Lombok li’pangngi jiong tiampa tikalebona, nadirenden ta’ka’ pemali alukna sumalunna Lombok, dibiring to kayangan jiong tiampanna tikalebona, angki langngan urrundunan pakkan aluk mellao langi’ didete’ karende kandaurena sangka’ passaleanna aluk linda’ padang-padang, napo aluk torro tolino napo pemali totongkon mentau mata

• Lendu’ tama talinga duanmi tiranduk tama suling patomalinmi Puang dipemala’i Puang dipekaduai, Puang dilauran langngan Puang dipaparanni sangpap’na do Puang duang papa’na tallung apa’ lima anna mangka sitodoran
  Makaruapa tang kulambi’ annanpa tang kuratui, do Puang Matua Puang Makole-kole do Puang Tumampa tau do komombong torro tolino, denka apa tang na tampa apaka tangna garage Puang umpasanda sangka’ umpapantanni taruno
  Mangngako li’pangko kulandi kupokada rara’ kudete’ kusa’bu’ rau-rau, do Puang dipemalai’i do Puang dipekaduai do Puang mangalloanan manik do Puang ma’papa bulawan
  do Puang dipemala’i Puang dipekaduai Puang dipa’rande-randei dao Puang kandeataan do diambo-amboran re’pe’ Puang dibarra’ marrian, sundallak pa’ barusanna pasuloan beluakna paarang lisu matanna dipemala’i dipakaduai dipa’rande-randei
  Puang to’bana’ to’ kalumpang do Puang to’ tabang sialongan do mammaranna pare pantan pare umba’na bulinna pare pantan garaganna, Puang sugi’ do le’bok sugi’ ma’kasea-sea do karua alangna annan panito disura’ mammaranna pare pantan pare umba’na bulinna pare pantan garaganna
  Puang dipemala’i do Puang dipekaduai Puang dipa’rande-randei do Puang Maruru’ Puang ma’komba barata do masinggi’ katonan tempo’ disapa’ pa’uaian, tipodo’ tiajo loko massipiak salu kande mammi’ mu massese arrusan timbu’ marasammu
  Do Puang dipemala’i Puang dipakaduai Puang dipa’rande-randei Puang malolo’ malalan anna Puang majionanna messaleanan garagako sangke’deran kombongko sangtiangkaran, tindak bantangmo sarira umbuyu’mo tarauwe mupotete mupolambanan, ammu rampan dilino sundemme’ kapadanganna pa’butagari pa bu marasa
  Siayoka tedong bati’na pundu to seko sitindo to ma’mawa bai ma’kale lendong anna bonde mangamba masapi, siayoka tedong manuk ma’tillok tora’ tanda masiang dipasitindo tedong tallang tang dipedaunni dipasitindo to ma’ mawa tallang sura’
  Kutambaipa sang puangmu kuoli’pa sangdeatammu

• ammu dipasitammu lan rante masangka’ mudipasidete’ lan rante masangka’ mudipasodete’ lan tandung sea-sea
  Puang tolapi’ tana jiong parande padudung, Puang pasali ala’ anna jiong Puang tokebali’bi’ Puang to kekaya-kaya, Puang malea isinna Puang borrong kanukunna Puang dipemala’i Puang dipekaduai
  Garako sangke’deran kombongko sangtiagkaran sola pambawa unta’mu passariri kinallomu tau sua-suasanmu

• Jiong Puang la dibungka’ ba’bana dibarrean goalinna, tibungka’ tang dilimangki tibarrean tang tarunoki, Tibungka’ nabungka’ aluk tibarrean nabarrean pemali, mallea to malinga'ko kumua tumbara ulang rara’na teapada banning bulawanna mubungka’ di ba’ba manikmu ammu sorongnganni palelan
  Tumanan mokkko talinga duanmu palempang moko suling patomalinmu ammi dipassisalu-salunna anna dipasikadawang-sikadawangna, tu tang mupomallo’ tang mu polewaga sipoulangmi jiong sumalunna Lombok jiong tiampan tikalebona

Next | 1 | 2 | 3 | 4 |