Massomba Tedong

Massoba Tedong pada acara Merauk Padang

Berikut ini adalah Hymne pada acara Massomba Tedong:

• Tonna rampan di lino lau’ ingko’na padang aluk sanda pitunna tonna lilla’ padang-padang lau' padang di rura pemali sanda iya’na
  Anna direnden tedong lau’mai rura aluk sanda pitunna dibatangan karambau lau’mai ingko’na padang pemali sanda iya’na

• Tuo balok mi lan padang di Toraya tumimbu’ kumuku’mi lan padang disali allo, direnden tedong mi tama padang di Deri aluk sanda pitunna dibatangan karambaumi tama tongkonan Pemanukan pemali sanda iya’na

• Tuo balok mi lan padang di Deri aluk mellao langi tumimbu kumuku’mi lan to bamba maruang pemali sanda iya’na
  langngan mi dilau anna lan padang di Deri aluk sanda pitunna rekkemi ditanga pelalan pemali sanda iya’na lan to bamba maruang

• To’long bunga’mi undara-dara lan merantena lino, ombo’mi asi-asianmi pudu’ marua lallangna, lan pangala kamban
  To’long bunga’mi sambao’ bangi’ ma’lalan kalambunan kulla’, ombo’ asi-asianmi sambao’ karurung ilan matampu’na padang
  To’long bunga’mi pundu to seko lan merrantena lino ombo’ asi-asianmi sokko mempala’ lan kapadanganna

• Langnganmi to sumio aluk burake tua tungka sanganna to untakin bembe dandanan sangka’
  Langnganmi nalau’ tanda to sumio’ aluk, rekkemi nakanna pelalan to sisaladan bulo ala’ pananda bisara
  Nature ta’bami to sumio’ aluk bati’na pundu to seko nakua makamban moko sitambenan bara’ bati’na sambao’ karurung malinta’ moko sikala’ kaso banua tallangna undara’- dara’
  

• Makamban moko sitambenan bara’ manimpa’ moko sikala’ kaso banua bati’na bulu malea
• Apa nakua to sumio’ aluk bati’na pundu to seko iyamo iya la muala alan ketirambanni sumalunna Lombok keli’pangngi jiong tiampan tikalebona, ketirambanni tongkonanna pare melloi langi’ keli’pangngi isungan kapayunganna pare pantan pare umba’na bulinna
  Bati’na pundu to seko la muala lalan, ke sumuru’i kanan kairinna sumalunna Lombok kemisara’ka’i la’pek patomalinna jiong tiampan tikalebona, anna pokendekki lompona padang, napolangnganni lu’pa tikalebona jiong sumalunna Lombok

• Bati’na pundu to seko, la misorong langngan Puang Matua do mai tangngana langi, Puang Metampa komombong torro tolino
  Misorongi langngan Puang to’ bona to’ kumpang jo to’ tandung siliuan, ketirambanni pare tabang di langi’ jiong sumalunna Lombok keli’pangngi pare pantan pare umana’na bulinna jiong tiampan tikalebona
  Bati’na pundu to seko la mupatama rante masangka’ la mu pa’lalan tandung sea-sea
  Diganti iya toma’ bulu datu bati’na pundu to seko digente’ ia tedong mabase bulawan digente iya tedong masero pindan
  La na temme’ saripi ayakna Puang Matua do tangngana langi’, la matayang renden bulawanna Puang Metampa do lisunna batara, anna Puang Pegaraga jiong mangapi’na tana

• La tibukai ulangmo pangkapu’ Puang tikokka’ kaludende’ mi sangka’ passilambanan
  Tibukai ulangmo pa' kapu’ Puang Matua do tangnganna langi’ Puang Tumampa tau ungkombong torro tolino anna Puang Pegaraga jiong mangapi’na tana
  Larekkemo di bille tokayangan aluk sanda pitunna di pasibimbin kuli’ kayu jiong tiampan tikalebona, anna dipatu’tunmo undara-dara’ bati’na pundu to seko da jiaka tedong ma’bulu datu kombongiaka tedong masero pindan diganti mabase bulawan
  Dipasipori tekken pemali alukna sumalunna Lombok dipasibimbin kuli’ kayu pare tobang dilangi’, ketirambanni sumalunna Lombok keli’pangngi jiong tiampan tiklebona

• Puang Matua do tangngana langi’ la mu tuemo ulang rara’na bati’na pundu to seko la mu palanmo lisu pala’mu renden bulawanna toma’ bulu datu
  Diganti iya to masero pindan ditende iya to mabase bulawan
  Anna pokendekki lompona sumalunna Lombok, napolangnganni lu’pa tikalebona
  Anna pokendekki pare mellao langi’ jiong sumalunna Lombok na polangnganni pare pantan pare umba’ bulinna pare pantan garaganna jiong tiampan tikalebona

• Melomo tutu’ batangmu bati’na pundu to seko, di patu’tun lan rante masangka’ dipennoloan lan tandung sea-sea
  Dipasiayoka tedong sendana bonga lan tandung sea-sea di pasitindo to ma'mawa lamba’ lan rante masangka’
  Dipasiayoka tedong sarita to lamban di pasitindo to ma’mawa’ seleng sirenden
  Dipasiayoka tedong manuk ma’ tillok mundan, dipasitindo to ma’mamawa tanda masiang
  Dipastingayo tedong bai ma’kale tedong, dipasitindo to ma’mamawa bonde mangamba masapi
  Dipasiayoka tedong tallang tang dipedaunni, dipasitindo to ma’ mawa’ tallang sura’
  Dipasitingayo tedong kalosi ma’tangke masura, dipasitindo to ma’ mawa’ baulu madaun langi'
  Dipasitingayo tedong sulle gayangna eran dilangi, dipasitindo to ma’mawa’ solon tarapangna enda’ To Palullungan
  Melomo tutu bantangmu bati’na pundu to moko la disorong langan Puang Matua do tangngana langi’ la dipirikan rokko suling karra’na Puang Parande Padudung jiong mangapi’na tana anna lan merrantena lino

• Nasusukki mani’i bulu-bulummu to sirio sukaran aluk lan padang di Deri, nabirrian mani’i lite lomba’mu to sisaladan bulo ala pananda bisara lan tongkonan Pemanukan
  Na birri’ mani’ lite lomba’mu toma’ karerean aluk na susukki mani’i buku rapomu to sirio sukaran aluk
  Ke’de’ di nene' mumi bati’na sambao’ langi’ dipengo'ngoran langan puang matua do tangngana langi’ tempon todolomu dipekaduan rokko Puang Parande Padudung jiong mangapi’na tana anna lan merrantena lino

• Kusanga masinangla’mo tutu batangmu disorong langan Puang Matua do tangnganna langi’ masindungmo lan pa’inawanmu dipirrikan rokko biring karra’na Puang Parande Padudung jiong mangapi’na tana
  Dipasirondong moko sendana bonga, dispasiayoka tedong moko lamba’ layuk
  Diapsiayoka tedong moko bai ma’kale londong dipasitindon to ma’ mawa’ moko bonde mangamba masapi
  Dipasiayoka moko manuk ma’robe sarira dipasitindo’ to ma’mawa moko tanda masiang ke tirambanni sumalunna Lombok kali’pangngi jiong tiampan tikalebona

Next | 1 | 2 | 3 | 4 |