Massomba Tedong_2

• Puang Matua kumombong torro tolino do tangngana langi’ Puang Pagaraga jiong mangapi’na tana, tiramban komi mani’i kusalu kupokada rara’ li’pang komi mani’i kusa’bu’ rau-rau
  Na makamban ku potuo kollong namanimpa’ ku pokulambu penawa matindo banu’ karurungan, la mu toimo ulang rara’na ma’bulu datu la musapumo boko’ tang boringanna palisu sirenden digantimo tedong masero pindan bati’na pundu to seko ditende’mo iya tedong mabase bulawan
  La mu toemo ulang rara’na tedong mosa bulunna la musapumo boko’na tang boringanna palisu sirenden anna pokendekki sumalunna Lombok napo marumbo’i pare pantan pare umba’na bulianna anna dipang lapo’i randanna sumalunna Lombok na dipabu’tu-bu’tui pangriuanna tiampan tikalebona

• Disorongan sangpuangna pare mellao langi’ didapa-dapan sangmendeatanna pare pantan pare umba’na bulinna, wai susunna torro tolino pare mellao langi’ pendoyanganna to tongkon mantau mata, na kandei torro tolino keanak marapuan tallang napatobang dikollong to tongkon mentau mata tuo ma’ kaponan ao’, tang napora’ lindona dandan torro to lino tang na birri’ pa’uasoan to tongkon mentau mata

• Lendu’ tama talinga duanmi Ppuang Matua do tangngana langi’ tiranduk tama suling patomalimmi Puang Pagaraga jiong mangapi’na tana, apa la sang lindorika napatu tuangga to sirio/aluk lan padang di Deri, sukaran la sang tanda rika napotu mimbu’ kumuku’ to sisaladan bulo ala’ pananda bisara lan to bamba maruang
  Manda’ na allonni tang maling natulabonni tang malilu langan masondokanna bayu aluk mellao langi’ ke tirambanni sumalunna Lombok rekko nalendokan tali bae’ ke li’pangngi jiong tiampan tikalebona
  Iamo ia te langangan narundunan pakkan to sirio sukaran aluk lan padang disillanan rekke nabille beluak to sisaladan bulo ala pananda bisara lan to bamba maruang, lendu’ tama talinga duammi Puang Matua do tangngana langi’ tiranduk tama suling patomalimmi Puang Parande Padudung diong mangapi’na tana
  Tang na lambi’ randan pudukki to sirio sukaran aluk lan padang di Deri tang na dete’ nunungan lilaki sanglopi to kalambanan to sisaladan bulo ala pananda bisara lan to bamba maruang
  Tangkilambi’mo la kikali uaka’na tonna tipamulanna aluk sanda pitunna tang kidete’ mo la kinunnung lame-lamena tonna tiparanduk aluk sanda iya’na

• Umbai indemokomi kasalle massua’ Puang Matua do tangnganna langi’ kureangan moko Mi to napobatang Puang Parande Padudung jiong mangapi’na tana, la umpasirundunan pakkanni aluk mellao langi’ la umbilla to kayanganni aluk sanda pitunna
  Na makamban na potuo to sirio sukaran aluk lan padan di Deri nama nimpa’ napo kulambu kumila’ to sisaladan bulo ala’ pananda bisara lan to bamba maruang, tiku rindinapa anak to pande lan padang di Deri tasitagone-gonepa solo sarapangna todi potomatua, tiku rindingnapa to petamba puang anna to pelambe deata
  La ullengka’i langngan tangnganna langi’ anna jiong mangapi’na tana anna lan merantena lino ke manasui sanda manasu ke maindai sanda mainda

• EEEEeeeeeeeee Puang ditongkonni Puang diisung-isungngi Puang diosokki karerang dipati’dakki tallang tang dipedaunni, dipasirondong loloanda’ malimbuang ongan dinai tumanan dapo rumanduk batu lalikan, Puang dipemala’i Puang dipekaduai-duai
  Dipemala’i lan te allo melambi’ diparande-randei lan te kulla dipemarasai, tedong ma’bulu datu anna diganti tedong masero pindan bati’na pundu to seko ditulungan sumalunna Lombok di sa’ka’i jiong tiampan tikalebona, napo kendekki lompona padang napo langnganni lu’pa tiampan tikalebona

• Puang do tangngana langi’ Puang do lisu-lisuanna
  Puang Paonganni Puang Pasareongi unnonganni sangpuangna ussareongi sangdeatanna
  Puang dibarrena allo do Puang di lindona bulan di indo’ madenna
  do Puang di papatui, do Puang dipakaduai
  Puang annan saeluranna do Puang umpasikallo sarira
  do Puang dipemala’i Puang dipekaduai Puang dipa’rande-randei
  Puang la di bungka' ba’bana do Puang dibarrean goalinna
  Tibungka’ tang limangki tibarrean tang tarunoki
  Tibungka’ na bungka’ aluk tibarrean nabarrean pemali

Next | 1 | 2 | 3 | 4 |